DZAYER TAMANEƔT – Ixebber-d, ass n usamas, deg Dzayer Tamaneɣt, unemhal amatu n waddal ɣer uɣlif n tillumẓa d waddal, Mustapha Hassani, dakken iswi n Dzayer d asiɣer n yiwen niɣ sin n waddalen imezdayen ɣer Turarin Tulampiyin d-itteddun i ssefran ad d-ilint deg Los Angeles (Iwanaken Yeddukklen) deg 2028.
« Addal adzayri yettwagenses-d agenses yelhan, s umata, deg Turarin Tulampiyin, ladɣa deg waddalen iterrasanen am tetlitit, ardab, ajidu, asnasɣel, tiɣilt, d waddalen niḍen. Deg teẓrigt taneggarut, i yettwaxedtem melmi kan deg Paris, yewwi-d waddal adzayri igmaḍ d imezruyanen, ladɣa deg tleggimt d uhareg, s tzalɣiwin n wureɣ n Imene Khelif d Kaylia Nemour. Iswi-nneɣ d arram n usemɣer n udraw-a s yiwen niɣ sin n waddalen imezdayen deg teẓrigt i d-itteddun », ɣef wakken i d-yenna ugensas n uɣlif n tillumẓa d waddal deg yiwen n usarag n tɣemsa i iga ɣer yidis n unemɣur n tmagla deg tesɣimt n Tseqqimt Tulampit d Taddalant Tadzayrit.
Deg wayen yerzan tacrawt n udraw adzayri deg Turarin Tulampiyin n Paris, yettwali Hassani dakken « werɛad ur d-yewwiḍ ara wakud akken ad d-yili fell-as wawal, ladɣa ma neɣs ad d-nessiwel ɣef tesmalt-a s ufatus », acku, ɣef leḥsab-nnes, « tifidiṛaliyin i terza temsalt werɛad ur d-smahint ara ticrawin-nsent. S waya, ulac d acu i nezmer ad t-id-nini”, ɣef wakken i d-yerna.
D acu kan, yyenna-d Mass Hassani dakken “s umata, adraw adzayri deg Turarin Tulampiyin n Paris” yella-d d asedwat. Yerna-d dakken kra n tmura am Ṛumanya sderwent ugar n yinaddalen ɣef Dzayer, maca ur ssawḍent ad d-ssemzint ula d yiwet n tzalɣi n wureɣ.
Seg yidis-nnes, iwufeq uwnetlay amatu n Tseqqimt Tulampit d Taddalant Tadzayrit, Kheireddine Barbari, ayen i d-yenna Mass Hassani, yernu yesmekti-d s kra n temsal d tixatarin yerzan addal am temsalt ideg d awezɣi ad d-yared yiwen s tseddi igmaḍ ad d-yilin yernu addal maci d tussna taseddit.
