DZAYER TAMANEƔT – Mennaw n yiwanaken d tuddsiwin tigraɣlanin i yessaẓren s tdusi, ass n ukwas, aserɣi n tsukin n Leqran i iga yiwen n umeẓriɣef sdat Tmesgida Tameqqrant n Stockholm, deg Sswid, yernu nnan-d dakken aya d igi « uḥqir », « asmentas » yernu ur yettwaqbal.
Ilmend n waya, tessaẓer Dzayer tadyant-a yernu tenna-d dakken aya yella-d « mgal wazalen n tsureft d tmeddurt ddukkli ». « Dzayer tessaẓar s tdusi igiten n kra n yimeẓriɣfen iswidiyen i yesserɣen taukint n Leqran Uqdis sdat Tmesgida Tameqqrant n Stockholm, deffir ma fkan yiduba iswidiyen asireg i usuddes n tmeskant ilmend n tigit n yigi-a uksin d urmasay », ɣef wakken i d-yenna yiwen n ulɣu n uɣlif n yiweẓla iwerdaniyen d umɣiwan aɣelnaw deg uzɣar.
Ma d aneɣlaf aṭerki n yiweẓla iwerdaniyen, Hakan Fidan, yenna-d deg umiḍan-nnes n Twitter: « Ad neɛleɣ tigawt-a, igi-a uḥqir i d-yellan mgal Udlis-nneɣ Uqdis, Leqran Uqdis, deg wass amezwaru n Tfaska Tameqqrant ». « Tuqqna n tiṭ ɣef tigawt tameɛfunt am ta d takafust », ɣef wakken i d-yerna.
Amutlay n uɣlif iṛani n yiweẓla iwerdaniyen, Nasser Kanan, yenna-d dakken « anabaḍ d uɣref n Tegduda Tislamant n Iṛan (…) ur qebblen ara rregmat am ti », yernu yessaẓer s tdusi igi-a asmentas, armasay ur yettwaqbalen ».
Seg yidis-nnes, yenna-d uselway arusi, Vladimir Putin, dakken yugi akk igiten am wi, yernu yessummel-d tattwaɣt n yiduba iswidiyen deg wayen yerzan acḥan-a mgal lislam.
