BELGṚAD – Tules twekked-d Serbya adhal-nnes i ukala i sseddayen Yiɣlanen Yeddukklen i usiweḍ ɣer tifrat « d tuɣdimt yernu d tunzigt » i umyenkaf n Tniri Tutrimt, ɣef wakken i d-yenna, ass n ukwas, yiwen n ulɣu n uɣlif n yiweẓla iwerdaniyen.
Ilmend n yiwet n tɣimit ideg yettwarmes unmazal n Dzayer deg Belgṛad, Fatah Mahraz, iwekked-d unmazul amenzu n uneɣlaf amenzu d uneɣlaf n yiweẓla iwerdaniyen n Serbya, Ivaca Dacic, tidgi n tmurt-nnes deg wayen yerzan taḍullit n « uferru amelwi » n wakk imyenkafen, gar-asen amyenkaf n temsalt n Tniri Tutrimt.
Ilmend n waya, yules iwekked-d Mass Dacic « adhal n Serbya i wussisen n ukala i sseddayen Yiɣlanen Yeddukklen i uferru n temsalt-a (n Tniri Tutrimt) s uzrak n usaḍuf agraɣlan d tneɣtusin n Ugraw Amatu d Useqqamu n Tɣellist n Yiɣlanen Yeddukklen i usiweḍ ɣer tifrat d tuɣdimt yernu d tunzigt », ɣef wakken i d-yenna uɣbalu-a.
Awekked-a n tdiplumatit taserbit d win d-yesskanayen daɣ tuqqla n Serbya ɣer usaḍuf agraɣlan deg wayen yerzan tamsalt tawnirit yernu d ayen i yefkan tiyita i tkerkas n Lmexzen d uɣawas-nnes n « tfulmant » i Tniri Tutrimt.
Aya yesskanay-d adhal i usaḍuf agraɣlan d tneɣtusin n Ugraw Amatu d Useqqamu n Tɣellist n Yiɣlanen Yeddukklen yerzan Tniri Tutrimt yellan d tamsalt n tukksa n usehres.
