Aɣtas n usguri n 12 n yimeggiyen yettmahalen deg tmazelt d tqenṣuliyin n Fṛansa deg Dzayer d imdanen irmeɣsa d « akat anayan yernu d aktussiɣ » i ddmen yiduba idzayriyen yernu yella-d waya ɣef lǧal n « yiba n tririt deg wayen yerzan aslelli adeɣyan n umeggi aqenṣulan » adzayri yettwabẓen deg Fṛansa, ɣef wakken d-iwekked, ass n usinas, uwnetlay n uwanak ɣer uɣlif n yiweẓla iwerdaniyen d-yelhan s umɣiwan aɣelnaw deg uzɣar, Sofiane Chaib.
« Nger-d tiɣri i uslelli adeɣyan n umeggi-a aqenṣulan yettwabẓen deg ubrid anagdud. Imi ulac tiririt, neddem aɣtas n tuẓẓɛa n 12 n yimeggiyen yettmahalen deg tmazelt d tqenṣuliyin tifṛansiyin deg Dzayer”, ɣef wakken d-yesguri i tliẓrit taɣelnawt.
Yezzireg-d uwnetlay-a n uwanak dakken “akat-a d anayan yernu d aktussiɣ”, iḥuza-d kan imeggiyen yellan ddaw tmaḍirt n uɣlif n ugensu afṛansi, imi tamsalt-a tamaynut tamentilt-nnes d taguri d tmudda i d-yellan ta deffir tayeḍ”, iswi-nnes d asersi n wunjugen i tdinamit n usduqqes n wassaɣen isindisanen.
Aneɣlaf afṛansi n ugensu, Bruno Retailleau « d netta i ibubben tamasit tummidt n tigawt-a d-yellan deg wattal d amaẓlay”, ɣef wakken d-iwekked Mass Chaib.
Ɣef leḥsab n uwnetlay n uwanak, tamsalt-a “tettwaɣref-d” s tḥilet i uswaɣi n “wassaɣen isindisanen yellan deg takkayt n ummelhu”, yernu yesmekti-d dakken tiɣri tansawalt n 31 meɣres yezrin gar yinemɣuren n uwanak n snat-a n tmura d “tin i d-yeskememen timeɣsiwt n wuɣal ɣer udiwenni gar snat-a n tmura d tukci n tzitla d tamaynut i wassaɣen isindisanen yellan gar-asent, d tazitla ad d-iḥazen akk timsal n unmireg d tnafut tubligt”.
