Mtawan kra n yimuzayen isertanen akken ad d-inin dakken tasertit tacengant n unhil amsutti n Mali mgal Dzayer ur tefki ara azal i wayen i yeɣs uɣref amali yernu aya d “igi amenɣiman”, yernu yella-d waya deffir kuẓ n yiseggasen n tenbaḍt mani ur ttwazerken ara yiḍwalen d-yellan seg yidis asertan, adamsan d uredsan.
Yesguri-d umuzay d usellaḍ asertan Mohamed Khodja i Tnegga n Yisalan n Dzyaer dakken anhil amsutti n Mali iga abrir d amerẓagu yernu imir-a, yuɣal iban dakken Bamako tettnadi ad tessukk tasersit d “tazulalt akk”, deg wakud mani llan yiɣallen iwerdaniyen d yimkariyen yettmahalen deg wakal-nnes.
Amuzay deg tkelsertit d wassaɣen igraɣlanen, Arslan Chikhaoui, yezzireg-d dakken imsuttiyen n Mali “tturaren turart d tamihawt”, yernu igi-a acengan yela-d deffir yinṭagen iwalanen i d-iga unmazul n uneɣlaf aqbur, Abdoulaye Maiga, deg tɣemlilt tis 79 n Ugraw Amatu n Tuddsa n Yiɣlanen Yeddukklen, i d-igan irdayen d usriden yernu war tuta mgal Dzayer s yiwet n umeslay d asengas yernu d arwatan.
Seg yidis-nnes, yenna-d usellaḍ asertan Redouane Bouhidel dakken tadekkilt tamsuttit yellan deg Mali “tettkemmil tasertit-nnes tarmasayt mgal Dzayer war ma teddem deg usuḍen matta yeɣs uɣref amali, yernu war ma tefka azal i wassaɣen imezruyanen ibelgen snat-a n tmura”.
Asellaḍ asertan Rachid Allouche yenna-d, seg yidis-nnes, dakken taguri n useqqamu aredsan deg Mali yella-d d asnas n tesmektayin d-zzubten yidisan d iwerdaniyen yettnadin ad swaɣen taɣellist d urkad n temnaḍt n Ssaḥel.
