Tefka Tidduka n Tseqqimin Tiɣelnawin Tulampiyin Tifriqiyin, ass n usamas, i uselway n tegduda, Mass Abdelmadjid Tebboune, tzalɣi n wureɣ n teklalit tulampit d taddalant tafriqit i ttafken i yinemɣuren n uwanak, am wakken i as-tefka daɣ asefk d azamulan, ɣef wakken d-yenna yiwen n ulɣu n tselwit n tegduda.
Ilmend n waya, yenna-d uwnetlay amatu n Tiddukla n Tseqqimin Tiɣelnawin Tulampiyin Tifriqiyin, Mass Ahmed Abou Elgasim, dakken tazalɣi-a tettunefk-as d tajmilt i “wazal amaẓlay i yefka uselway n tegduda i tillumẓa d waddal d tuṭṭfa-nnes deg udraw n Dzayer deg uǧuǧǧeg n Tefriqt d uderfi n yilemẓiyen d yinaddalen-nnes ama deg uswir aɣelnaw, ama deg yinmugren d yimsegrawen igraɣlanen d yimnaḍanen”.
Deg umyager-a, yenna-d uselway n tegduda dakken Dzayer ad temmager Turarin Taddalanin Tifriqiyin ass n 25 yulyu d-itteddun, yernu yessaram dakken turarin-a ad tent-ssuddusen s yimek d alugan deg wakk timura n Tefriqt akken ad yili waya d ansay ad yesdusen tadukli gar yigerdan ifriqiyen yernu ad d-yessileɣ tasuta d tamaynut n yinaddalen ifriqiyen.
Aselway n Tiddukla n Tseqqimin Tiɣelnawin Tulampiyin Tifriqiyin, Mass Mustapha Berraf, iwekked-d dakken tukci n tzalɣi-a i uselway n tegduda “tesskanay-d ussisen n Mass aselway d wazal yettafk i tillumẓa deg Dzayer d Tefriqt”, am wakken i yessarem ugar n umures i Dzayer d Tefriqt deg tɣult taddalant.
Seg yidis-nnes, yessaweḍ-d uneɣlaf anijiryan n waddal d uselway n Tesmilt Taɣelnawt n Waddalen, Mass Shehu Dikko, azulen n uselway n tmurt-nnes i uselway n tegduda, Mass Abdelmadjid Tebboune, yernu yessenfali-d adwat-nnes deg wayen yerzan isemtar imasnagen i as-yefka uselway n tegduda deg tfugla-a.
