Twekked-d tneɣlaft n temsetla taɣelnawt, tawacult d tegnit n tmeṭṭut, Massa Kaouter Krikou, ass n uynas deg Dzayer Tamaneɣt, ɣef wussisen n ugzum-nnes deg tmunit tasnafsant n yibalmuden imeɛdaṛ ladɣa deg tallit n yikayaden n tgara n useggas.
Deg yijifeṛ n yiwet n terzi n uswaḍ i tga ɣef Uɣerbaz n Yiɛeẓẓugen Imeẓẓyanen n Rrwiba, akken ad tetter ɣef waddad n usmuteg i yikayaden n tgara n useggas n 2023-2024 i yibalmuden imeɛdaṛ, twekked-d Massa Krikou ɣef wussisen n ugzum-nnes deg tmunit tasnafsant d tenmettit n taggayt-a, ladɣa s usmemmi n tsemsedda n ucegger n temsirin iɣef ara siggen yiselmaden d yimesnafsiyen.
Tenna-d tneɣlaft dakken « tamunit n yigerdan imeɛdaṛ tettwaḍmen s teɣzef n useggas aɣurbiz deg ukatar n wahil asensegman n ugzum yernu sdusuyen-tt deg tallit n yikayaden ».
Seg yidis niḍen, tessawel-d ɣef ahilen n ugzum i ubdad asensegman d usnafsan i yimeɛdaṛ deg yiɣsuren n ulmud yemmuzzgen d usegman, yernu tesmekti-d s wammaken d yisulal isensegmanen i d-smutgen i taggayt-a, ladɣa iɛeẓẓugen d wid ixuṣṣen iẓri.
Twekked-d daɣ Massa Krikou ɣef wussisen n uwanak deg wayen yerzan amesten n yimeɛdaṛ d wahilen yettwasmemmin akken ad asen-bedden deg wakk iswiren.
