Derreren-d uneɣlaf n yimjahden d yimttalasen, Mass Laid Rebiga, d uneɣlaf n yiweẓla n yimenɣan ibquren n Tegduda Tamegdayt n Ccinwa, Mass Pei Jinjia, ass n usiḍyas deg Dzayer Tamaneɣt, ɣef “telqayt” n wassaɣen idzayriyen-icinwaten, yernu wekkden-d ɣef tmeɣsiwt n snat-a n tmura akken ad ṣkent “ablag asnuddsan d amakki ad yilin d unfiɛ i yidisan-a deg sin”.
Deg umyager-nsen deg tesɣimt n uɣlif, Massaw Rebiga d Jinjia wekkden-d ɣef wussisen n uselway n tegduda, Mass Abdelmadjid Tebboune, d umtil-nnes acinwat, Mass Xi Jinping, ilmend n “ublag asnuddsan d amakki” gar Dzayer d Ccinwa, am wakken i d-yesmekti dakken snat-a n tmura belgen-tent wassaɣen imezruyanen d “idusanen yernu d uggilen”.
Yenna-d Rebiga dakken tirzi n uneɣlaf acinwat n yiweẓla n yimenɣan iqburen d tin i yeǧǧan tamagla tacinwat “ad tessen amahil n ugzum n yimjahden, ladɣa deg wayen yerzan abdad i yimjahden d yimttalasen d uḥraz n tkatut taɣelnawt, amezruy aɣelnaw d teṛcibin”.
Snat-a n tmura zemrent ad d-skemement ablag i umsenfal n termitin deg tɣult n tezrawin tussnanin d tesdawanin, takatut tamezruyant, abdad adawsan d unmetti i yimjahden d umsenfal n tewlafin d teftarin timezruyanin, ɣef wakken i d-yenna.
Seg yidis-nnes, yumel-d uneɣlaf acinwat assaɣen n tegmat gar tmurt-nnes d Dzayer, yernu iderrer-d dakken anmireg gar snat-a n tmura “itteddu akken yelha deg ubrid n uzeddi n ublag asnuddsan ddaw ulway n yiselwayen n snat-a n tmura”.
