Iwekked-d uneɣlaf n tnazent d tliɣwalt, Karim Bibi Triki, ass n usinas deg Dzayer Tamaneɣt, dakken 80% seg yimezdaɣen n Dzayer i ilan adaf ɣer Internet, am wakken i d-iwekked ɣef twaẓit i d-yellan deg usemḍen n yimeẓla.
Ilmend n usuddes n Tqacuct Tafriqt Tumḍint (Digital African Summit), deg Ugemmiw n Yidles n Moufdi Zakaria deg Dzayer Tamaneɣt, iwekked-d Mass Bibi Triki ɣef « yisurifen imeqqranen i tga Dzayer deg tɣult n usemḍen d ulkat umḍin », yernu yenna-d dakken 80% seg yimezdaɣen n Dzayer lan adaf ɣer Internet ».
Yerna-d dakken « asetrer n yimeẓla n tnazent d usemḍen n tɣula niḍen itteddu s yisurifen d imeqqran », am wakken i d-yerna dakken Dzayer « temmuteg » akken ad tesseqdec akk timesnegt-nnes deg tɣult-a i tallalt n tmura tifriqiyin.
Ma d aneɣlaf n tdamsa n tmussni, tigemma d temẓermisin, Yacine El Mahdi Oualid, yesmekti-d, seg yidis-nnes, s wakaten isebɣasen, ladɣa akaten idrimanen, i teɣtes ad ten-teddem Dzayer i usebɣes n yilemẓiyen akken ad d-gen tiṛmisin-nsen, yernu iger-asen-d tiɣri akken ad adfen ɣer wulzuz umḍin afriqi.
Seg tama niḍen, aselway n useqqamu n tedbelt n Tdukli Tanaznant Tameɣradant, Mass Isaac Gnamba Yaou, ihenna tamurt n Dzayer ɣef yisurifen i tga deg tɣult n usemḍen.
I usmekti, Taqacuct Tafriqit Tumḍint tettili-d deg yiwen n wakud d snat n tedyanin tisnatwilanin niḍen yernu ti d ICT Maghreb d tmesrit n tliɣwalt n ALVTIC s tihawt n wugar n 100 n yinesmigalen seg tmura tifriqiyin yemgerraden d wazal n tmiḍi n teṛmisin d tgemma.
