Yella-d uselhu n usedger n waman n tissit deg tɣiwanin n utaram n twilayt n Wehṛan seg wasmi i tettwarẓem tneɣreft n usiẓed n waman n yilel n Yiɣef Amellal, i yudfen deg umeẓlu imalas aya, ɣef wakken d-yenna, ass n ukwas, unemhal n Teṛmist n Waman d Usedwes n Wehṛan, Mass Oussama Helaili.
Yenna-d Mass Helaili, deg yiwen n usarag n tɣemsa i usmahi n tusurin tunmigin n wadaf n tneɣreft n usiẓed n waman n yilel n Yiɣef Amellal deg umezlu, i yeẓẓunẓa uselway n tegduda, Mass Abdelmadjid Tebboune, dakken tiɣiwanin timezwura ad d-yesfaydin seg uselhu-a d Ɛin Ṭṭerk, Buṣfer, Lɛenṣer, Ɛin Lkeṛma akked Butlilis. Yerna-d dakken tiɣiwanin-a ad uɣalent lant aman yal ass.
Deg tidet, tamnaḍt tutrimt tella tettawi-d aman seg teɣsert n “Ceṭṭ Lehlal” i ilan akettur n 200.000 n yimitren igasasen deg wass, yernu d tin yessedgaren aman i Ɛin Timucent. S waya, tawilayt-a taneggarut ad tuɣal tebleg aman-nnes d twilayt n Sidi Belɛebbas.
Ammelhu-a, ɣef wakken d-yerna umasay-a, ad d-tḥaz imik, imik, tamnaḍt tutrimt n twilayt, yernu ad d-tesfaydi seg waya Ɛin Lbiḍa, deg Ssanya, iɣaramen n AADL n Messerɣin, akked utaram n temdint n Wehṛan. Yessefk ad d-nesmekti dakken akettur n ufares n tneɣreft n usiẓed n waman n yilel n Yiɣef Amellal tewweḍ ɣer 300.000 n yimitren igasasen deg wass.
Deg wayen yerzan tamnaḍt tagmuḍant, yezzireg-d Mass Khodja Houari, anemhal n ufares deg teṛmist-a, dakken ad d-yili deg-s daɣ uselhu n usedger n waman, imi 40.000 n yimitren igasasen n waman n wuggug n Cclef, deg Mestɣanem, ssassɣen-ten-id i twilayt n Wehṛan deffir ma yerna uswir n uɣelluy n unẓar melmi kan deg temnaḍt-a, yernu ḥazen-d, s waya, 15 n yimelyunen n yimitren igasasen.
Yezzireg-d dakken timerniwt-a tessemɣer tiɣbula n waman yettwassassɣen i twilayt n Wehṛan seg 470.000 n yimitren igasasen ɣer 550.000 n yimitren igasasen deg wass, yernu, a win yufan, ad awḍen ɣer 600.000 n yimitren igasasen deg wussan imezwura n wayyur uqdis n Remḍan, yernu d aya ad yessiwḍen ɣer usmuteg n unagraw n usigeẓ ayalas deg umur ameqqran seg tɣiwanin n twilayt n Wehṛan.
