Yezzireg-d uneɣlaf n yimjahden d yimttalasen, Laid Rebiga, ass n ukwas deg Reggan, deg unẓul n twilayt n Udraw, dakken « isṭerḍiqen iɣwawanen i tga Fṛansa tahersant, deg wass yecban ass-a deg 1960, deg Tniri tadzayrit ttɣimin-d d tajrimt mgal talsa, s wakk inumak n wawal-a, yernu d actaf i Fṛansa ».
Deg wawal-nnes ilmend n urẓam n usarag agraɣlan ɣef yisṭerḍiqen iɣwawanen ifṛansiyen deg Tniri tadzayrit, yernu deffir ma gan tafugla n usiweḍ n tmella i yimeɣrusen d teɣtas n tejrimt-a taɣwawant tanakkaḍt i iḥuzan tamnaḍt-a, iwekked-d Mass Rebiga dakken « aql-aneɣ nessawaḍ tamella, ass-a, s tmasit, sdat tkesna-a akken ad d-nessken isemda d yibriden n tukksa-nsen, yernu ad d-yili waya s usuɣal n yizerfan n teɣtas tilsanin d twennaḍt akked uḍman n yimal i temnaḍt mani i d-yella waya ».
Aneɣlaf n yimjahden yumel-d amures n yisurifen d wussisen i tga Tredsa Taɣelnawt Taɣerfant, yellan d tamekkasut tamaklalt n Tredsa n Uslelli Aɣelnaw, deg wayen yerzan tukksa n telminin d uṣeggem akked usedwes n wasunen ugdilen akken ur deggẓen ara yimezdaɣen n wasunen ilasanen seg telminin, am wakken ad d-tuɣal talwit ɣer temnaḍin-a.
Yerna-d dakken « aselway n tegduda, Mass Abdelmadjid Tebboune, seg zik i d-iger tiɣri i tukci n tixxutert i tkatut taɣelnawt d umezruy imi d nitni i d taneffgt n tɣellist deg wayen yerzan amzaɣ n tummda n tmurt d uɣlan i d-yekksen tilelli-nnes s tɣersawin n yimeɣrusen-nneɣ imanganen.
Deg ukatar n usfugel n umekti wis 65 n umulli n yisṭerḍiqen iɣwawanen ifṛansiyen, termes tɣiwant n Reggan asarag agraɣlan ɣef usgum-a s uzwel n « Tijrimin Tilsanin, Tikesniwin Timeɣlalin d Tmasit Taweddbant ». Asarag-a derwen deg-s yimnadiyen d yisdawanen d yigensasen n tuddsiwin n Pulinizya d Fṛansa i terza temsalt n yisṭerḍiqen iɣwawanen ifṛansiyen.
Amyager-a d win mani d-smagin taggiwin d timuddirin d tid n teɣtas n yisṭerḍiqen ifṛansiyen deg Tniri tadzayrit d tmura niḍen n umaḍal, akken ad d-sseknen tiwwagent d triɣeft n usehres afṛansi deg temsizzelt-nnes akken ad tadef ɣer twinest n tmura tiɣwawanin, s tkafust n yiɣallen yellan mgal uzarug d tlelli n yiɣerfan.
