Taqacuct Tis 38 n Tdukli Tafriqit, ad d-yilin ussan n usiḍyas d usamas deg Addis Abeba, ad teslummes ɣef usmal n temsalt n teɣdemt d uxelleṣ n yimẓlen i Yifriqiyen, imi aya d takkayt takmamt deg uṣeggem n uḍlam amezruyan d usmal n uhedden gar yiɣerfan n umenẓaw d yimdanen d-yekkan seg Tefriqt.
Asgum n useggas-a d “Taɣdemt i Yifriqiyen d Yimdanen d-yekkan seg Tefriqt s Yimiẓlen”, yernu fernen-t yinemɣuren n uwanak d unabaḍ deg tɣemlilt tunnimt tis 37 n Ugraw n Tdukli i d-yellan deg Fuṛaṛ n 2023 deg Addis Abeba.
Iswi n waya netta d awwas deg usegrew n yiɣermanen ifriqiyen d yiminigen n Tefriqt akken ad ṣken tirni tubligt yeddukklen, ilmend n temsalt n teɣdemt n uxelleṣ n yimiẓlen i Yifriqiyen ɣef lǧal n tejrimin timezruyanin d tzenga timezdayin i d-yellan mgal Yifriqiyen d yimdanen d-yekkan seg Tefriqt, ladɣa asehres, apartheid d tenɣaɣreft.
Ad mahlen daɣ yimedrawen akken ad smemmin tidgi tafriqit d tubligt deg wayen yerzan imiẓlen d uhedden, akked uzeddi n wahil n tigawt n Tdukli Tafriqit.
Tidgi-a, a win yufan, ad d-teslal tisentayin i uṣeggem n traɣedmin timezruyanin d-yekkan seg usehres, tasaklit d usmeḥyef anagrawan, ladɣa akaz amezruyan, amiẓel adriman, iriri n wakal, aḥraz adelsan, tismeskal tisertanin, tamasit tagraɣlant d usfulmen n yimɣiwanen.
