Seg wass n ukras d asawen, ad teṭṭef Dzayer taselwit n Useqqamu n Tɣellist n Tuddsa n Yiɣlanen Yeddukklen i wayyur n yennayer, yernu tessefray ad tfareṣ seg tselwit-a akken ad tessiweḍ taɣect n tmura taɛṛabin d tefriqiyin yernu ad temzeɣ timsal tuɣdimin.
Aseggas seg wasmi i tettwafren d tamaslaḍt tarmezgit n ugman-a aɣelduklan, imir-a, d nnuba n Dzayer akken ad teṭṭef taselwit n Useqqamu n Tɣellist i tallit n wayyur, yernu ta d tallit mani ad tefk tuzwirt d tamaẓlayt i yikaramen yerzan Agmuḍ Alemmas, ladɣa Falesṭin yettwawedgen d umennuɣ mgal tremɣa deg Tefriqt.
Dzayer tessefray, ilmend n waya, ad tessuddes askasi aɣlifan anagdud akraḍyuran n Useqqamu ɣef “tegnit deg Ugmuḍ Alemmas, deg-s ula d tamsalt tafalesṭinit ». Awnetlay amatu n Tuddsa n Yiɣlanen Yeddukklen, Antonio Guterres, yessefk ad yedrew deg tedyant-a.
Azal n 15 n wayyuren seg wasmi i yebda ulekkid aṣehyuni anɣaɣerfan mgal tesfift n Ɣezza, yettwakcef-d taɛinanit dakken Aseqqamu n Tɣellist n Tuddsa n Yiɣlanen Yeddukklen ur yezmir ara ad yeḍmen ula d amesten addayan i yiɣarimen ifalesṭiniyen.
Ulama imaslaḍen-nnes ufrinen, ladɣa Dzayer, gan ussisen akken ad d-yuɣal udiwenni deg Useqqamu yernu ad yeddem uneggaru-a tamasit-nnes mgal tenɣaɣreft d-yettilin deg Ɣezza, agman agejdan n Yiɣlanen Yeddukklen, d-yelhan s uḥraz n talwit d tɣellist tagraɣlant, yeqqim yebḍa.
