Tger-d Dzayer tiɣri, ass n usinas, i uzeddi n tesmilt n tsestant tagraɣlant i ukcaf n tidet ɣef wakk tijrimin i iga uyun aṣehyuni deg yigelluyen ifalesṭiniyen, yernu tesseddi-d dakken wid yellan d imasayen ɣef tejrimin-a yessefk ad ttwaḥasben.
« Yessefk ad d-nzeddi tasmilt tagraɣlant ilmend n tsestant deg wayen yerzan akk tikinnanin (n tejrimin) yerzan tagnit deg yigelluyen ifalesṭiniyen yettwawedgen. Yal tameddurt tamelsit i iṛuḥen tuklal ad d-tili fell-as tasestant d tafrawant yernu d tamzarugt”, ɣef wakken i d-iwekked, deg New York, ugensas imezgi n Dzayer ɣer Yiɣlane Yeddukklen, Amar Bendjama.
Deg tgermant-nnes deg temlilit n Useqqamu n Tɣellist d-yellan ɣef tegnit deg Ugmuḍ Alemmas, iwekked-d Mass Bendjama dakken Dzayer tessuɣun dakken wid i igan tijrimin deg Ɣezza deg ulekkid aṣehyuni, « akken ɣsen ilin, yessefk ad ttwaḥasben ».
Ɣef leḥsab n Dzayer, ur yessefk ara ad tili tsertit n sin wakaten. Yal tameddurt tamelsit yessefk ad tettwammesten. Amenzay-a atan deg wul n usaḍuf amdanan agraɣlan i yettmestinen iɣarimen, ladɣa tisednan d yigerdan deg yimyenkafen umrigen”, ɣef wakken i d-yesmekti. “Nefles deg teɣdemt ur ilin tilisa. Yiwen ur yelli nnig usaḍuf yernu yiwen ur yessefk ad d-yesfaydi seg urselqu”, ɣef wakken i d-yerna.
“Tasmekta n 18.000 n yigerdan i yettwenɣen deg Ɣezza. Ur uklalen ara tasestant tagraɣlant ideg ad ttwaḥasben wid i ten-yenɣan?”, ɣef wakken i d-yetter. Adiplumati-a adzayri yerna-d dakken 8000 n tsednan timelsiyin, 1000 n wumrisen n ugzum n tdawsa d wugar n 200 n yineɣmasen i yeɣlin d imeɣrusen deg Ɣezza, yernu yetter-d ma yella tiɣtas-a ur uklalent ara ad d-tili fell-asen tasestant.
