Iwekked-d uselway n tegduda, Mass Abdelmadjid Tebboune, ass n usamas, dakken Dzayer tegguccel ad taweḍ ɣer uswir n tmura tiflalalyin s yiswi n usiweḍ ɣer ufaris agensi anusem n 400 n yimelyaṛen n yidulaṛen imarikaniyen seg-a ɣer tgara n 2027.
Deg yiwet n tinawt i d-iga ilmend n urẓam n teẓrigt tis snat n Umyager Aɣelnaw d Yimsemhal Idamsanen, yesguri-d uselway n tegduda: “Nebda-d asenbeḍ wis sin s usirem n usiweḍ n tmurt ddukkli ɣer uswir n tmura tiflalayin”, am wakken d-iger tiɣri i usebges n wakk idisan i terza temsalt i “usiweḍ ɣer ufaris agensi anusem n 400 n yimelyaṛen n yidulaṛen imarikaniyen seg-a ɣer tgara n 2027”.
Deffir ma yesmekti-d dakken “asenbeḍ amezwaru ifuk s wakk isirmen d tikmiwin-nnes ɣef lǧal unfafad bu tedri”, iwekked-d uselway n tegduda dakken “yessefk, ass-a, ad nessedwu ɣef yilemẓiyen idzayriyen d tgemma, acku ifassen-nsen d izedganen yernu atni ttgen-d iseḍra iyes nefrec”.
Mi d-yebder tadinamit n usfukti d-yettilin deg tmurt deg yiseggasen-a ineggura, yesseɣmes-d uselway n tegduda dakken Tanegga Tadzayrit n Usmal n Usfukti tekles-d, ar ass-a, 13.700 n yisenfaren n usfukti d-iḥuzan akk tiɣula d yigzumen idamsanen s wazal yewwḍen ɣer 6.000 n yimelyaṛen n yidinaṛen idzayriyen.
Deffir ma yumel-d ussisen-nsen, iger-d tiɣri uselway n tegduda i yimsemhal idzayriyen akken “ad fken affaf” i ugzum adamsan.
Deg wayen yerzan tismeskal i iga uwanak akken ad yesselhu anezwu n yiweẓla, ad yesḥerfi asfukti yernu ad yefk taferka tamgurant, ladɣa deg ukatar n usaḍuf amaynu n usfukti, yezzireg-d uselway n tegduda dakken “awanak ur yessemraray ara deg usenzi n wakal n usfukti, wanag yettawes deg usifses n tmesɣiwt n tferka ilmend n usekmem n yisenfaren”.
Ilmend n waya, iḥettet-d ɣef wanaḍ n uslelli n tsentayt deg usfukti, ladɣa deg temguri, mani Dzayer tga asurif d aɣaran, yernu yenna-d dakken “akken ad d-yili unegmu, yessefk tamguri ad tli amur ittezzin gar 13 d 14% (deg tmiḍi) seg ufaris agensi anusem”.
“Tanegga Tadzayrit n Usmal n Usfukti yessefk ad tt-id-nessuffeɣ seg umgal d anakkaḍ: D timrawin n yigiman n yisenfaren i d-yettwakelsen, deg wakud mani ulac taferka mani ad d-ttwasseḍrun”, ɣef wakken d-iḥettet.
Mi d-yebder isurifen i tga Dzayer deg ugzum akerrazan, s usdusu n tɣellist-nnes tanuččit, ladɣa deg tyufa tisnuddsanin, iwekked-d uselway n tegduda ɣef tixxutert n useɣyed n watigen n yifarisen am lbaṭaṭa.
“A win yufan, aselway n tegduda ur yessawal ara ɣef watig n lbaṭaṭa”, ɣef wakken d-yenna uselway n tegduda, d-iḥetteten ɣef tḍullit n “useɣyed n watigen n ufaris-a”.
Yesmekti-d, daɣ, dakekn « Dzayer tessaweḍ ɣer usedwetman deg yirden iquranen deg uswir n 81%”. Tessaweḍ daɣ ad tessedmes 1,2 d amelyaṛ n yidulaṛen imarikaniyen deg useggas-a s usenqes n waǧaw n ufaris-a amedduran, ɣef wakken d-yerna, am wakken yumer s tdinamit d-yettwakelsen deg wayen yerzan asfukti d ufares n mennaw n yifurka ikerrazanen i yuwsen deg usenqes n tfatuṛt n waǧawen deg Dzayer.
“Uqbel Amussu Aɣerfan Amurɣid, Dzayer tella tettaǧew-d 60 n yimelyaṛen n yidulaṛen. Ass-a, nessenqes tafatuṛt n waǧawen s yimek d amṣukan yernu d agaran n waǧawen ɣer 40 n yimelyaṛen n yidulaṛen, yernu nettmahal akken ad nernu ad tt-nessenqes”, ɣef wakken d-yesseɣmes uselway n tegduda.
“Ayen i d-igan unjug deg tmurt d asemrara d usinef i usaḍuf”, ɣef wakken d-iwekked, am wakken d-yerna dakken wid d-yettinin dakken ttaggaden takurmut yernu sbeɛwiqen deg tuɣdaḍin-nsen « swingimen aswingem n yimeggufsa d yimesfatayen ».
Mi d-yebder ablag adzayri-uṛufi, yenna-d uselway n tegduda dakken « timura tuṛufiyin d tineblagin n Dzayer yernu qeblent acegger n umtawa n ublag, am wakken nekkni maci d awezɣi i nessuter ». Yerna-d daɣ, i yimsemhal : « Kenwi d aḥric ur ibeṭṭun seg ucegger-a”.
