Yules iwekked-d uselway nt egduda, Mass Abdelhamid Tebboune, ass n uynas, ɣef uguccel-nnes akken ad yesnes tisertiyin tiɣelnawin n unfal adamsan ilmend n uzgar seg tdamsa yersen ɣef tmerɣa ɣer tdamsa tamanuḍt yersen ɣef usiǧew.
Deg yiwet n tinawt ilmend n usfugel n umulli aslag n useɣnew n Tdukli Tamatut n Yimahalen Idzayriyen d useɣlen n tmerɣa, i d-yeɣra s yisem-nnes uneɣlaf amenzu, Mass Nadir Larbaoui, deg yiseksal n usfugel n umulli-a aslag deg Ḥasi Mesɛud (Waregla), iwekked-d uselway n tegduda dakken tukkit-a tettgensis-d « aɣad d asnuddsan » ad iḍemnen i tsutwin d-itteddun amur-nsen n tbuɣar tigamanin yernu ireẓẓem waya tawwurt i usfukti araray deg temguriwin tiɣrafanin, aṛmas d useɣnew n teṛmisin, am wakken ad yeḍmen daɣ waya asnummed n yigaktiyen idamsanen d itraren yersen ɣef yihri alsan s yisem-nnes d tadusi yesseddayen tasenfayt yernu tesseɣnaw-d tabaɣurt.
Yezzireg-d uselway n tegduda dakken Dzayer tga isurifen d ixataren deg useḍru n yiswiyen-a, yernu tenzeɣ-d igiman n yilemẓiyen d yimesfuktiyen iɣelnawen d yiwerdaniyen, am wakken i tewweḍ ɣer yiswiyen ur ilin tuta deg wayen yerzan isiǧwen yexḍan timerɣa. S waya, Dzayr ad tkemmel deg tmuɣli-a ad tt-yeǧǧen ad teṭṭef adeg i tuklal deg unmager n tmura d-yetteflalin.
Deffir ma yumel-d aswir n tesguri d uskerwi n yikataren imḍebbren deg temṣukin tipitṛulanin d yimahalen n ugzum-a amedduran, d imsaduren niɣ d imeswuriyen, akked yiseḍra d-yemseḍfaren deg yiseggasen-a ineggura deg ugzum n tmerɣa, yesruɣed uselway n tegduda seg wul timahalin d yimahalen n wakk igzumen, am wakken i d-yezzireg dakken awanak ur yettcuḥḥu ara akk i kra n wussisen akken ad tesselhu akatar-nsen n tmeddurt d umahil, deg ukatar n uwanak anmetti yettwaḥerzen deg Tesguri n Umenzu n Wamber.
