Yesmahi-d uneɣlaf n uwanak, aneɣlaf n teẓwert, inaɣzen d teẓwar d-yettuɣalen, Mohamed Arkab, ass n usinas, asenfar n usaḍuf inebbḍen irmuden inaɣzanen, sdat Tesmilt n Yiweẓla Idamsanen, Anegmu, Tamguri, Tanezzut d Usɣiwes n Ugraw Aɣerfan Aɣelnaw.
Asenfar-a n usaḍuf yettwasmahi-d s tihawt n uselway n Ugraw Aɣerfan Aɣelnaw, Brahim Boughali, tawnetlayt n uwanak ɣer uɣlif n teẓwert d-yelhan s yinaɣzen, Massa Karima Tafer d tneɣlaft n wassaɣen d umni, Kaouter Krikou.
Mi d-yesmahi Mass Arkab aneskin-nnes, yezzireg-d dakken asenfar-a yella-d deg ukatar n tesmeskelt n ukatar asiḍfan inebbḍen irmuden inaɣzanen, imi i yuɣal waya d aḍulli i usduqqes n usfukti deg tɣult-a d usezgi n usaḍuf-a ɣer wakaten i yeddem uwanak akken ad yessineḍ tadamsa taɣelnawt.
Tasmeskelt-a tella-d deffir yiwen n uslaḍ d alqayan n ugzum anaɣzan deg Dzayer, yernu yekcef-d uslaḍ-a assaren deg tnefkiyin tisnakalanin d tnaɣzanen deg ayen yerzan iketturen izaranen n tmurt, am wakken daɣ ulac tigra timaynutin n yinersiyen ittwamaden.
Nnig waya, yekcef-d daɣ uslaḍ-a dakken “asfukti uslig drus deg wammad n tnegwa n yinekfel yernu ulac akk asfukti awerdani deg ugzum anaɣzan, am wakken afares n kra n tnegwa tinaɣzanin ur yessedwat ara israten n wulzuz aɣelnaw, dɣa d aya i yessawḍen aǧaw ad irennu ulama llan yinersiyen », ɣef wakken d-yenna uneɣlaf amenzu.
Asenfar-a yessefray kra n wakaten, isebɣas d tsekkirin yettwasnasen deg umaḍal akk, yernu yettwassumer-d usaḍuf-a i usebɣes n usfukti anaɣzan.
Iswi-nnes agejdan d asnegmu n tdumṣukin tisnakalanin n tmurt d uḍman n wadaf ilelli ɣer telɣa yellan d tirselt n yal asenfar n wammad anaɣzan akked usifses n wadaf ɣer tɣult tanaɣzant taɣelnawt, ladɣa deg wayen yerzan tinegwa yudfen deg unhil anaɣzan, ilmend n usnimel d usnirem n wasunen ur yettwasnarmen s tsekkirin d « tiḥerfiyin yernu d tifrawanin » ad d-yessumren akk tiḍmanin i yimesfuktiyen akken ad skemmen isenfaren-nsen n usnirem yernu ad d-sfaydin seg uzref n wammad mer ad d-afen inersiyen ittwamaden, ɣef wakken d-yessegza Mass Arkab.
Iswi n usenfar-a d tukci n yizwal inaɣzanen d izerfanen, d wid ad ireẓmen abrid i usuter n teɣbula tidrimanin yessefken i usidrem n yisenfaren inaɣzanen, asefruri n tsekkirin yerzan irmuden inaɣzanen d usersi-nsent deg yimenḍaren usḍifen d iseddiyen. Ad d-yili waya s tekwat tayiwnant ad d-teggenses Tnegga Taɣelnawt n Yirmuden Inaɣzanen, ɣef wakken d-yerna uneɣlaf.
Yessefray daɣ usaḍuf-a asmal n ugbur adigan, s usebɣes n uselket amguran adigan n tnegwa tizaranen d-yettwassfen, akked uzeddi n ukatar asudan d-yettwagmen seg tmeskar tigraɣlanin timuyafin, d tid i smemmint tnegga tinaɣzanin d-yelhan ladɣa s usnuḍef d usmal n yirmuden inaɣzanen.
