Tamkarḍit tudmawant n Ccix Abdelhamid Benbadis, aɣella n ufara deg Dzayer, ad tettunefk i Tmesgida n Dzayer, ilmend n usfugel n « Wass n Tmussni », i d-yettilin ass n 16 Yebrir n yal aseggas, ɣef wakken i d-yenna, ass n uynas, deg Qsenṭina, uselway n Tesbeddit n Abdelhamid Benbadis.
Tamkarḍit-a llan deg-s tasmekta n wagim n yidlisen yerzan tiɣula yemgerraden n tmussni, gar-asent taɣerma tislamant, timsal n tussunt, afeṣṣer, tasekla d tmedyezt, d idlisen i yella yesseqdac Abdelhamid Benbadis deg umecwaṛ-nnes aggagan d tesmeskelt, ɣef wakken i d-yenna Mass Abdelaziz Filali i d-iwekkden ɣef tixxutert n tsentayt-a yekkaten i uḥraz n uḥric n tkatut n uɣlan.
Talkensit n yidlisen n uferras n tleslalit taggagant d usmeskal adzayri Abdelhamid Benbadis d tin ideg llan yidlisen i d-yewwi seg Maṣer, Tunes, Lḥiǧaz d temnaḍin niḍen, ɣef wakken i d-yenna Mass Filali, i d-yernan dakken, deg tallit-nni, asehras afṛansi iḥettem-d taferga ɣef yidlisen akken ad yessedreg tamagit taɣelnawt.
Idlisen-a ttwasgerwen-d yernu rsen deg taddart n twacult n umeṛḥum Abdelhak Benbadis, gma-s n usersal d uselway amezwaru n Tiddukla n Yiɛalmen Inselmen Idzayriyen, ɣef wakken i d-yenna umasay-a.
Tamkarḍit tudmawant n Ccix Benbadis (1889-1940) ad ters deg usalay d temkarḍit n Tmesgida n Dzayer deg ukatar n tsentayt yekkaten akken ad tesdus assaɣ gar tsutwin d-yemmalen d tgemmi taɣelnawt d tmezruyant, ɣef wakken i d-iwekked Mass Filali.
