Iwekked-d uneɣlaf n uwanak, aneɣlaf n yiweẓla iwerdaniyen, amɣiwan aɣelnaw deg uzɣar d yiweẓla ifriqiyen, Mass Ahmed Attaf, ass n usamas deg Addis Abeba, dakken Dzayer d Ityupya lant assaɣen d “uggilen yernu d imedyanen” yersen ɣef wazalen, imenzayen d wuktuyen n tdukli tafriqit, tadukli tasertant d unummed adamsan n umenẓaw.
Mi yesselwi, d tuta-nnes ityupi, Mass Gedion Timothewos, taɣemlilt tis 5 n Tesmilt Turtikt Tadzayrit-Tityupit, yenna-d Mass Attaf dakken “Dzayer d Ityupya seg zik i lant assaɣen d uggilen yernu d imedyanen, d wid i yesdewten idisan-a deg sin d wakk amenẓaw afriqi, yernu aya yettban-d s yiksaben n unmireg-nneɣ asindisan d ugeddisan”.
Dzayer d Ityupya dima muhlent ddukkli « s uzrak n wazalen, imenzayen d wuktiyen n tdukli tafriqit i usdusu n wassaɣen-nsent isindisanen d usiweḍ ɣer yiswiyen-nsent ubligen”, ɣef wakken d-iwekked.
Ɣef wakken d-yenna Mass Attaf, “snat-a n tmura ddment timasiyin d tixatarin yernu urarent timlilit d tiqerḍalin deg udhal n tdukli tadelsant d unummed adamsan n Tefriqt. Seg zik i lant tamuɣli d tubligt, maci kan deg wassaɣne-nsent isindisanen, wanag ula deg wayen yerzan anagraw ageddisan s umata, am wakken i lant timuɣliwin d tubligin deg wakk timsal, ladɣa deg wayen yerzan amenẓaw afriqi s ubrid usrid niɣ arusrid”.
Yezzireg-d Mass Attaf amirew imezgi d-yellan i tesguri yettwasmemmin gar snat-a n tmura deg yunyu n 2013, d win isemmlen assaɣen isindisanen n ublag asnuddsan, yernu yenna-d dakken aɣtas-a “d amasnag, imi assaɣen gar Dzayer d Ityupya d assaɣen isnuddsanen ama deg tsekna-nsen, deg yigburen d yiswiyen-nsen”.
