Bdan yimahilen n unmuger n yiweẓla adzayri-acinwat ɣef usfukti deg Dzayer, ass n usinas deg Dzayer Tamaneɣt, s udraw n mennaw n yimsemhal idamsanen ixataren n snat-a n tmura.
Deg unmuger-a i tessuddes Tnegga Tadzayrit n Usmal n Usfukti deg Wammas Agraɣlan n Yisaragen n Abdelatif Rahal (Dzayer Tamaneɣt) ddaw leɛnaya tunnigt n uselway n tegduda, Mass Abdelmadjid Tebboune, ad ttwazmlent temyaqqanin d tsektayin n umsegzu gar yimsemhal idamsanen idzayriyen d yicinwaten.
Tadyant-a d tin mani ad d-ssiwlen ɣef tlemmiẓin n usfukti yellan deg Dzayer d tsertit tacinwat n usfukti deg uzɣar, am wakken ad ssuddsen imyagren isindisanen n yiweẓla.
Anmuger-a ssuddsen-t s usgum n “Ablag uggil, anmireg adamsan d unzig”, yernu iswi-nnes d asdusu n ublag adamsan gar snat-a n tmura s usermed n yimtawayen isindisanen d usdusu n unmiger akked usmal n Dzayer akken ad tili d taɣerwaḍt timbeccert n usfukti deg Tefriqt d temnaḍt tagrakalant.
Iswi niḍen n unmuger-a d asmussen n tlemmiẓin n usfukti deg yigzumen isnuddsanen uzwiranen, asebɣes n useɣnew n teṛmisin tubligin gar teṛmisin tidzayriyin d tutawin-nsent ticinwatin, asifses n unermis usrid gar yimeggiyen idamsanen, adhal n usineḍ adamsan, asekki n testatwilt d usegrer n ublag ilmend n unmireg adamsan unzig d ubɣuran gar sin-a n yidisan.
